جاتني كثير اسئلة في الانستقرام عن البي بي كريم و ال سي سي و حبيت اوضحلكم الفرق عشان تعرفوا تختاروا الي يناسبكم ..
البي بي كريم :
هو اختصار لكلمة Beauty Balm نجي لمميزات البي بي كريم.
- مرطب للبشرة
- يكون فيه واقي شمس
- تغطيته اقوى شوي من السي سي كريم
السي سي كريم :
هو اختصار لكلمة Color Corrector يعني مصحح للون البشرة و مميزات السي سي كريم.
- فوائده للبشرة علاجية
- يكون فيه واقي شمس
- تغطيته اخف من البيبي كريم
- يغذي البشرة
بس الفرق الوحيد ان السي سي كريم يصحح لون البشرة مثلا لو كان في احمرار يخفيه و يعطي اشراقة للبشرة !
نقدر نقول ان السي سي كريم النسخة المطورة من البي بي كريم و تغطيته اخف و متوفر بدرجات اكثر من البي بي كريم و الهدف منه تصحيح لون البشرة ❤️
** اختار البي بي كريم ولا سي سي كريم ؟
اذا حابة تغطيه خفيفة و مظهر طبيعي و لون موحد انصحك بالسي سي كريم اذا عندك اثار في بشرتك و هالات انصحك بالبي بي كريم لان تغطية اقوى شوي من السي سي كريم.
** هذي انواع البيبي كريم الي جربتها و رأيي فيها !
بي بي كريم من سماش بكس ..
فيه حماية من الشمس تغطيته شوي ثقيلة يعني تحسي انك حاطة شي في وجهك الماركة كانت موجودة في سيفورا بس سحبوها انا اشتريته من دبي بس للاسف ما افتكر سعره.
بي بي كريم بودنس ..
كنت مره في السوبرماركت و رحت قسم العناية بالبشرة شفتهم منزلينه جديد اتحمست و جربته كان جميل و خفيف ما تحسي انك حاطة شي و يناسب الصبح اكثر او خرجات بسيطة الفينش طبيعي سعره ٣٠ ريال.
بي بي كريم غارنيه ..
شفته في امازون و عجبني طلبته من تاجرة في الانستقرام ووفرتلي هوا حبيته مره يناسب البشرة الدهنيه لانه اويل فري و حبيته لانه متوفر بدرجات اكثر من الي عندنا و تغطيته كويسه سعره كان تقريبا ٥٠ او ٦٠
بي بي كريم كلارنس ..
ثقيل تحسي انك حاطة شي في وجهك ينفع الي تعاني من حبوب و اثار متوفر في فيسيز سيفورا دبنهامز سعره تقريبا ١٥٠ ريال.
بي بي كريم غارنيه ..
متوفر في كل السوبرماركت و الصيدليات خفيف مره يناسب الصباح اكثر و متوفر منه درجتين عكس الي طلبته من امازون سعره ٢٠ ريال.
بي بي كريم ديور ..
اكثر نوع حبيته تغطيته تجنن تعطيني لووك طبيعي انا عندي درجتين وحدة في لوني و الثانيه درجة التان مررره حبيتهم ما احس اني حاطة شي في وجهي و كل ما احطهم انسأل عنهم بس العيب الوحيد ان السعر مبالغ بالنسبة لحجمهم الصغير يمكن في حدود ٢٠٠ و شي.
و بس ان شاء الله تكونوا استفدتوا من التدوينة ❤️❤️
ليست هناك تعليقات:
إرسال تعليق